1Sa 12 | NdeIBE | STEP | USamuyeli wathi kubo bonke abako-Israyeli, “Ngikuzwile konke elikukhulumileyo kimi njalo sengilibekele inkosi.

1 Samuel 12

Inkulumo kaSamuyeli yokuvalelisa

1 USamuyeli wathi kubo bonke abako-Israyeli, “Ngikuzwile konke elikukhulumileyo kimi njalo sengilibekele inkosi.

2 Khathesi selilenkosi engumkhokheli wenu. Mina sengiluphele lenwele sezimpunga, lamadodana ami lilawo khonapha. Kade ngingumkhokheli wenu kusukela ebutsheni bami kuze kube lamhla. 3 Ngikhonapha. Fakazani okubi ngami phambi kukaJehova logcotshiweyo wakhe. Ngubani engake ngathatha inkabi yakhe na? Ngubani engake ngathatha ubabhemi wakhe na? Ngubani engake ngamqilibezela? Ngubani engake ngamcindezela na? Kukwezikabani izandla engake ngamukela imfumbathiso ukuba ngivale amehlo ami na? Uma ngake ngenza okunye kwalokhu, ngizakubuyisela.”

4 Baphendula bathi, “Kawuzange usiqilibezele loba usicindezele. Kawuthathanga lutho esandleni somuntu.”

5 USamuyeli wasesithi kubo, “UJehova ungufakazi umelane lani, logcotshiweyo wakhe ungufakazi ngalelilanga, ukuthi kalitholanga lutho esandleni sami.” Bona bathi, “Yena ungufakazi.”

6 USamuyeli wasesithi ebantwini, “NguJehova owakhetha uMosi lo-Aroni wakhupha oyihlomkhulu eGibhithe. 7 Khathesike manini khonapha, ngoba ngizamelana lani ngobufakazi phambi kukaJehova ngazo zonke izenzo ezilungileyo uJehova owazenzela lina laboyihlo.

8 “Emva kokuba uJakhobe esefikile eGibhithe, bakhalela usizo kuJehova, uJehova wasethuma uMosi lo-Aroni, abakhupha okhokho benu eGibhithe bazabahlalisa kule indawo.

9 “Kodwa bamkhohlwa uJehova uNkulunkulu wabo; ngakho wabanikela esandleni sikaSisera, umlawuli webutho laseHazori, lasezandleni zamaFilisti kanye lasenkosini yamaMowabi, balwa labo.

10 Bakhala kuJehova bathi, ‘Sonile, simdelile uJehova sakhonza oBhali labo-Ashithorethi. Kodwa khathesi ake usikhulule ezandleni zezitha zethu, sizakukhonza.’ 11 Lapho-ke uJehova wathuma uJerubhi-Bhali, loBharakhi, loJefitha kanye loSamuyeli, walikhulula ezandleni zezitha zenu inxa zonke, yikho lahlala livikelekile.

12 “Kodwa kwathi lapho libona ukuthi uNahashi inkosi yama-Amoni wayesizalihlasela, lathi kimi, ‘Hatshi, sifuna inkosi yokusibusa,’ lanxa uJehova uNkulunkulu wenu wayeyinkosi yenu. 13 Khathesi nansi inkosi eliyikhethileyo, yona elayicelayo; khangelani, uJehova uselibekele inkosi phezu kwenu. 14 Uma limesaba uJehova limkhonze njalo limlalele lingahlamukeli imilayo yakhe, njalo uma lina kanye lenkosi elibusayo lilandela uJehova uNkulunkulu wenu – kuhle! 15 Kodwa uma uJehova lingamlaleli, njalo uma lihlamukela imilayo yakhe, isandla sakhe sizamelana lani, njengoba sasimelane laboyihlo.

16 “Khathesi-ke manini lithule libone into enkulu uJehova asezayenza phambi kwamehlo enu! 17 Kanti khathesi akusisikhathi sokuvuna amabele na? Ngizakhuleka kuJehova ukuba athumele umdumo lezulu. Njalo lizabona ukuthi yinto embi njani elayenzayo emehlweni kaJehova lapho licela inkosi.”

18 Emva kwalokho uSamuyeli wakhuleka kuJehova, njalo khona mhlalokho uJehova wathumela umdumo lezulu. Ngakho abantu bonke bamesaba uJehova loSamuyeli.

19 Bonke abantu bathi kuSamuyeli, “Khulekela izinceku zakho kuJehova uNkulunkulu wakho ukuze singafi, ngoba sesengeze kwezinye zonke izono zethu ngobubi bokucela inkosi.”

20 USamuyeli waphendula wathi, “Lingesabi. Selibenzile bonke lobububi; kodwa lingamfulatheli uJehova; kodwa khonzani uJehova ngezinhliziyo zenu zonke.

21 Lingaphendukeli ezithombeni ezingasizi lutho. Zingeke zilenzele lutho, kumbe zilihlenge, ngoba kazilasizo. 22 Ngenxa yebizo lakhe elikhulu uJehova kayikubalahla abantu bakhe, ngoba uJehova wathokoziswa yikulenza libe ngabakhe. 23 Mina-ke kangiyikukwenza ukuthi ngenze isono kuJehova ngokungalikhulekeli. Njalo ngizalifundisa indlela enhle lelungileyo.

24 Kodwa mesabeni ngeqiniso uJehova, limkhonze ngobuqotho ngezinhliziyo zenu zonke. Khumbulani izinto ezinkulu alenzela zona. 25 Kodwa lingaphikelela ukwenza okubi, lina lenkosi yenu lizakhukhulwa.”